डीप लर्निंगच्या माध्यमातून ‘Sentiment Analysis’वर संशोधन
कणकवली (प्रतिनिधी) : आधुनिक तंत्रज्ञान आणि कृत्रिम बुद्धिमत्तेच्या क्षेत्रात उल्लेखनीय संशोधन करत कणकवली नगरपंचायत च्या भाजपा गटनेत्या सौ. सुप्रिया समीर नलावडे यांनी संजय घोडावत विद्यापीठ, अतिग्रे येथून इलेक्ट्रॉनिक्स विषयात पीएच.डी. पदवी संपादन केली आहे. ‘Sentiment Analysis using Deep Learning’ या अत्याधुनिक आणि भविष्यातील तंत्रज्ञानाच्या दृष्टीने महत्त्वपूर्ण विषयावर त्यांनी केलेल्या संशोधनाची विशेष दखल घेण्यात आली आहे. आजच्या डिजिटल युगात सोशल मीडिया, ऑनलाइन व्यवहार, ग्राहकांच्या प्रतिक्रिया तसेच विविध डिजिटल माध्यमांमधून व्यक्त होणाऱ्या भावभावना आणि मतांचे विश्लेषण करण्यासाठी Sentiment Analysis या तंत्रज्ञानाला मोठे महत्त्व प्राप्त झाले आहे. याच पार्श्वभूमीवर सुप्रिया नलावडे यांनी Deep Learning च्या माध्यमातून Sentiment Analysis अधिक अचूक आणि कार्यक्षम करण्यावर आपले संशोधन केंद्रित केले.
या संशोधनामध्ये त्यांनी Deep Learning, Convolutional Neural Network (CNN), Natural Language Processing (NLP) तसेच विविध Optimization Techniques यांचा प्रभावी वापर केला. मानवी भावना आणि मतांचे संगणकीय पद्धतीने अधिक अचूक विश्लेषण करण्यासाठी आधुनिक तंत्रज्ञानाच्या विविध पद्धतींचा अभ्यास करून त्यातून अधिक परिणामकारक प्रणाली विकसित करण्याच्या दृष्टीने त्यांनी संशोधन केले.
सुप्रिया नलावडे यांच्या संशोधनातील ALGO-DeAM या कार्याला विशेष महत्त्व प्राप्त झाले असून, सन 2026 मध्ये त्यांच्या या संशोधनाला ‘Journal of Systems Science and Systems Engineering’ या आंतरराष्ट्रीय संशोधन नियतकालिकात प्रकाशन मिळाले आहे. त्यामुळे त्यांच्या संशोधनात्मक कार्याला शैक्षणिक क्षेत्रासोबतच आंतरराष्ट्रीय स्तरावरही महत्त्वाची मान्यता मिळाली आहे.
हे महत्त्वपूर्ण संशोधन पूर्ण करण्यासाठी त्यांना प्रा. डॉ. शामला आर. महाडिक यांचे मोलाचे मार्गदर्शन लाभले. त्यांच्या मार्गदर्शनाखाली सुप्रिया नलावडे यांनी संशोधनातील विविध आव्हानांवर मात करत यशस्वीपणे पीएच.डी. पदवी प्राप्त केली. सुप्रिया नलावडे यांच्या या यशामुळे संजय घोडावत विद्यापीठाच्या शैक्षणिक आणि संशोधन क्षेत्रातील लौकिकात आणखी भर पडली आहे. अत्याधुनिक तंत्रज्ञानाच्या माध्यमातून भविष्यातील गरजा लक्षात घेऊन केलेले त्यांचे संशोधन विद्यार्थ्यांसह नव्या संशोधकांसाठीही प्रेरणादायी ठरणार आहे. त्यांच्या या उल्लेखनीय शैक्षणिक व संशोधनात्मक यशाबद्दल संजय घोडावत विद्यापीठातील प्राध्यापक, सहकारी, कुटुंबीय, मित्रपरिवार आणि शुभेच्छुकांकडून त्यांच्यावर अभिनंदनाचा वर्षाव होत आहे. ज्ञान, संशोधन आणि अत्याधुनिक तंत्रज्ञानाची सांगड घालत मिळविलेली ही पीएच.डी. पदवी त्यांच्या शैक्षणिक वाटचालीतील मानाचा टप्पा ठरली आहे.
