एलपीजी, सीएनजी व पेट्रोलचा सुरळीत पुरवठा, ध्वनिप्रदूषणावर नियंत्रणासह वाहतूक नियोजन
ह्युमन राईट्स असोसिएशन फॉर प्रोटेक्शनच्या वतीने कोकण विभागीय अध्यक्ष संतोष नाईक यांच्यावतीने जिल्हाधिकाऱ्यांकडे निवेदनाद्वारे मागणी
कणकवली (प्रतिनिधी) : कोकणातील अत्यंत महत्त्वाचा आणि मोठ्या उत्साहात साजरा होणारा गणेशोत्सव अवघ्या काही दिवसांवर येऊन ठेपला आहे. या काळात सिंधुदुर्ग जिल्ह्यात मोठ्या प्रमाणावर नागरिक, चाकरमानी तसेच पर्यटक दाखल होणार असल्याने जिल्ह्यातील अत्यावश्यक सेवा, इंधनपुरवठा, सार्वजनिक सुरक्षा आणि वाहतूक व्यवस्था सुरळीत ठेवण्यासाठी प्रशासनाने आगाऊ नियोजन करावे, अशी मागणी ह्युमन राईट्स असोसिएशन फॉर प्रोटेक्शनच्या वतीने कोकण विभागीय अध्यक्ष संतोष नाईक यांच्यावतीने जिल्हाधिकाऱ्यांकडे करण्यात आली आहे.
संघटनेच्या वतीने ३ सप्टेंबर २०२६ रोजी जिल्हाधिकारी, सिंधुदुर्ग यांना निवेदन देण्यात आले असून, गणेशोत्सवाच्या कालावधीत नागरिकांना कोणत्याही प्रकारचा गैरसोयीचा सामना करावा लागू नये, यासाठी विविध उपाययोजना करण्याची मागणी करण्यात आली आहे.
घरगुती एलपीजी गॅसचा नियमित पुरवठा करावा
गणेश चतुर्थीच्या सणाच्या पार्श्वभूमीवर जिल्ह्यातील विविध भागांत मोठ्या संख्येने चाकरमानी व पर्यटक दाखल होतात. त्यामुळे घरगुती एलपीजी गॅसची मागणी मोठ्या प्रमाणात वाढण्याची शक्यता आहे. जिल्ह्यातील सर्व गॅस एजन्सींमार्फत नागरिकांना वेळेत व नियमित गॅस सिलिंडरचा पुरवठा करण्यात यावा. कोणत्याही भागात गॅस सिलिंडरचा तुटवडा निर्माण होऊ नये, यासाठी संबंधित यंत्रणेला आवश्यक सूचना देण्यात याव्यात, अशी मागणी निवेदनात करण्यात आली आहे.
सीएनजी पंपांवर पुरेसा साठा उपलब्ध ठेवण्याची मागणी
गणेशोत्सवाच्या काळात मोठ्या प्रमाणात वाहनांची ये-जा होणार असल्याने जिल्ह्यातील सर्व सीएनजी पंपांवर सीएनजी गॅसचा नियमित आणि पुरेसा पुरवठा उपलब्ध करून देण्याची मागणी करण्यात आली आहे. इंधनाच्या कमतरतेमुळे नागरिक व वाहनचालकांना गैरसोयीचा सामना करावा लागू नये, याची दक्षता संबंधित विभागाने घ्यावी, असे निवेदनात नमूद करण्यात आले आहे.
पेट्रोल पंपांवर पुरेसा इंधनसाठा ठेवण्याचे आवाहन
गणेशोत्सवाच्या काळात जिल्ह्यात वाहनांची संख्या मोठ्या प्रमाणावर वाढण्याची शक्यता लक्षात घेऊन सर्व पेट्रोल पंपांवर पेट्रोल तसेच अन्य आवश्यक इंधनाचा पुरेसा साठा उपलब्ध ठेवण्यात यावा. इंधनटंचाईमुळे नागरिकांची गैरसोय होऊ नये, यासाठी संबंधित विभागाने योग्य नियोजन करावे, अशी मागणीही संघटनेने केली आहे.
ध्वनिप्रदूषण करणाऱ्या डीजेच्या आवाजावर नियंत्रणाची मागणी
गणेशोत्सव हा उत्साहाचा आणि आनंदाचा सण असला तरी सार्वजनिक शांतता आणि पर्यावरणाचे संरक्षण करणेही तितकेच आवश्यक असल्याचे निवेदनात म्हटले आहे. जिल्ह्यात ध्वनिप्रदूषण करणाऱ्या तसेच निर्धारित नियमांचे उल्लंघन करणाऱ्या डीजेच्या अतिउच्च आवाजावर नियंत्रण ठेवण्यात यावे. यासाठी संबंधित पोलीस यंत्रणा व स्थानिक प्रशासनाने आवश्यक ती कार्यवाही करावी, अशी मागणी करण्यात आली आहे.
गणेश विसर्जन मिरवणुकांमध्ये लेझर लाईटच्या वापरावर बंदीची मागणी
गणेश विसर्जनाच्या मिरवणुकांमध्ये वापरण्यात येणाऱ्या लेझर लाईटमुळे नागरिकांच्या डोळ्यांना व आरोग्याला धोका निर्माण होण्याची शक्यता आहे. तसेच वाहनचालकांचे लक्ष विचलित होऊन अपघात होण्याची शक्यताही नाकारता येत नाही. त्यामुळे सार्वजनिक सुरक्षेच्या दृष्टीने गणेश विसर्जनाच्या मिरवणुकांमध्ये लेझर लाईटचा वापर बंद करण्यात यावा, अशी मागणी निवेदनाद्वारे करण्यात आली आहे.
जिल्ह्यातील वाहतूक व्यवस्थेचे योग्य नियोजन करावे
गणेशोत्सवाच्या कालावधीत सिंधुदुर्ग जिल्ह्यात मोठ्या प्रमाणावर वाहतूक कोंडी निर्माण होण्याची शक्यता आहे. त्यामुळे जिल्ह्यातील सर्व तालुक्यांच्या ठिकाणी तसेच प्रमुख बाजारपेठा, बसस्थानके, रेल्वे स्थानके आणि गणेश विसर्जनाच्या मार्गांवर वाहतुकीचे योग्य नियोजन करण्यात यावे. गर्दीच्या ठिकाणी आवश्यकतेनुसार अतिरिक्त पोलीस व संबंधित कर्मचाऱ्यांची नियुक्ती करण्यात यावी, अशी मागणी करण्यात आली आहे.
गणेशोत्सवाच्या काळात जिल्ह्यात येणाऱ्या नागरिकांना कोणत्याही प्रकारचा त्रास होऊ नये तसेच सण शांततेत, सुरक्षित वातावरणात आणि उत्साहाने साजरा व्हावा, यासाठी संबंधित सर्व विभागांना आवश्यक त्या सूचना देऊन तातडीने योग्य कार्यवाही करावी, अशी नम्र विनंती ह्युमन राईट्स असोसिएशन फॉर प्रोटेक्शनच्या वतीने कोकण विभागीय अध्यक्ष संतोष नाईक यांच्यावतीने जिल्हा प्रशासनाकडे करण्यात आली आहे.
गणेशोत्सवाच्या पार्श्वभूमीवर प्रशासनासमोर आता इंधनपुरवठा, ध्वनिप्रदूषण, लेझर लाईट आणि वाहतूक नियोजन या चारही महत्त्वाच्या बाबींवर प्रभावी अंमलबजावणी करण्याचे आव्हान आहे.
