देवगड धक्क्यावर आणण्याचे प्रयत्न रात्री उशिरापर्यंत सुरू
देवगड (प्रतिनिधी) : देवगडसमोरील समुद्रात मच्छीमारीसाठी असलेल्या ‘भगवती कृपा’ या नौकेला सोमवारी रात्री भीषण आग लागून मोठे नुकसान झाले. या नौकेवरील २५ खलाशांना अन्य नौकांच्या मदतीने सुखरूप बाहेर काढण्यात आले. त्यामुळे मोठी जीवितहानी टळली. दरम्यान, आग लागलेली नौका देवगड धक्क्यावर आणण्यासाठी रात्री उशिरापर्यंत प्रयत्न सुरू होते. मात्र, समुद्रातील वाऱ्याचा जोर आणि वारंवार तुटणारे दोरखंड यामुळे या प्रयत्नांत अडथळे निर्माण होत होते.
देवगड बंदराजवळ समुद्रात ‘IND-MH-4-MM-1614’ नोंदणी क्रमांकाची संतोष रमेश पेंडणेकर यांच्या मालकीची ‘भगवती कृपा’ नौका अचानक जळू लागली. नौकेला आग लागल्याचे लक्षात येताच परिसरातील अन्य नौकांनी मदतीसाठी धाव घेतली. त्यानंतर नौकेवरील सर्व २५ खलाशांना सुरक्षितपणे अन्य नौकांवर स्थलांतरित करण्यात आले. या घटनेत कोणतीही जीवितहानी झाल्याचे वृत्त नाही.
दोरखंड तुटल्याने बचावकार्यात अडथळे
आग लागलेल्या नौकेला दोरखंडांच्या साहाय्याने ओढून देवगड बंदरातील धक्क्यावर आणण्याचे प्रयत्न सुरू करण्यात आले. मात्र, समुद्रातील वाऱ्याचा जोर आणि नौकेची अनियंत्रित हालचाल यामुळे वारंवार दोरखंड तुटत होते. त्यामुळे नौका ओढून आणण्याच्या प्रयत्नांना अडथळे येत होते. नौकेवरील आग पूर्णपणे विझलेली नसल्याने ती पुन्हा भडकण्याचीही भीती व्यक्त केली जात होती.
रात्री उशिरापर्यंत स्थानिक मच्छीमार आणि अन्य नौकांच्या मदतीने नौका सुरक्षितपणे बंदरात आणण्याचे प्रयत्न सुरू होते. आग पूर्णपणे नियंत्रणात आणून नौका सुरक्षितपणे धक्क्यावर आणण्याचे आव्हान संबंधित यंत्रणांसमोर होते.
आगीच्या कारणांचा तपास सुरू
घटनेची माहिती मिळताच मत्स्यव्यवसाय विभागाचे अधिकारी आणि पोलीस घटनास्थळी पोहोचले. नौकेला आग नेमकी कोणत्या कारणामुळे लागली, तसेच या दुर्घटनेत किती आर्थिक नुकसान झाले, याची माहिती अद्याप स्पष्ट झालेली नाही. या घटनेमुळे देवगडमधील मच्छीमारांमध्ये चिंता व्यक्त होत असून, नौका सुरक्षितपणे बंदरात आणण्याच्या प्रयत्नांकडे सर्वांचे लक्ष लागले आहे.
सर्व २५ खलाशी सुखरूप असल्याने मोठा अनर्थ टळला असला, तरी नौकेचे नुकसान किती झाले, हे आग पूर्णपणे विझल्यानंतरच स्पष्ट होणार आहे.
फोटो – मासेमारी नौकेला लागलेली आग.
