झुंजार मित्र मंडळाचा पुढाकार; मोतीबिंदूसह डोळ्यांच्या विविध आजारांची होणार तपासणी
खारेपाटण (प्रतिनिधी) : झुंजार मित्र मंडळ, खारेपाटण यांच्या वतीने विवेकानंद नेत्रालय आणि रेटिना सेंटर, कणकवली यांच्या सहकार्याने शनिवार, १७ ऑक्टोबर २०२६ रोजी नेत्र तपासणी शिबिराचे आयोजन करण्यात आले आहे. हे शिबिर खारेपाटण येथील बाजारपेठेतील विष्णुमंदिर येथे सकाळी १० ते दुपारी २ या वेळेत पार पडणार आहे.
या शिबिरात नागरिकांच्या डोळ्यांची तपासणी, मोतीबिंदू तपासणी तसेच डोळ्यांच्या इतर आजारांची तपासणी करण्यात येणार आहे. यासोबतच तज्ज्ञ डॉक्टरांकडून डोळ्यांच्या आरोग्याबाबत मार्गदर्शन व सल्ला दिला जाणार आहे. तसेच नागरिकांना चष्मे अल्प दरात उपलब्ध करून देण्यात येणार आहेत.
आजच्या धावपळीच्या जीवनशैलीत डोळ्यांच्या आरोग्याकडे अनेकदा दुर्लक्ष होते. वेळेवर तपासणी न झाल्यामुळे दृष्टीसंबंधित समस्यांचे गांभीर्य वाढू शकते. ही बाब लक्षात घेऊन नागरिकांना नेत्रतपासणीची सुविधा उपलब्ध करून देण्यासाठी झुंजार मित्र मंडळाने हा उपक्रम हाती घेतला आहे.
या शिबिराचा खारेपाटण आणि परिसरातील नागरिकांनी लाभ घ्यावा, असे आवाहन आयोजक झुंजार मित्र मंडळाच्या वतीने करण्यात आले आहे.
