सावंतवाडी (प्रतिनिधी) : दोघा अज्ञात युवकांनी महिलेच्या गळ्यातील मंगळसूत्र लांबविल्याची घटना सावंतवाडी येथील माठेवाडा परिसरात घडली. आज दुपारी एक वाजण्याच्या सुमारास ही घटना घडली. अनुराधा सापळे, असे फसवणूक झालेल्या महिलेचे नाव आहे. त्या पायी चालत जात असताना संबंधित दोघेही युवक तिच्या जवळ आले. पुढे चोरी झाली आहे, तुमच्या गळ्यातील मंगळसूत्र आमच्याकडे द्या, असे त्या युवकांनी महिलेला सांगितले. त्याचवेळी भेदरलेल्या संबंधित महिलेने आपले मंगळसूत्र “त्या” युवकांकडे सुपूर्त करताच त्यांनी पळ काढला. दरम्यान याबाबतची माहिती मिळताच पोलिसांनी घटनास्थळी धाव घेत तपास सुरू केला आहे. तर परिसरात नागरिकांनी सुद्धा मोठी गर्दी केली आहे.
संबंधित महिला येथील माठेवाडा परिसरातून पायी चालत जात होती. यावेळी संबंधित दोघे युवक घटनास्थळापासून काहीशा अंतरावर आपली दुचाकी उभी करून तिच्या जवळ आले. तसेच सावंतवाडी शहरात मंगळसूत्र लांबविणारे चोर आले आहेत. ते आता याच परिसरात फिरकले आहेत. त्यामुळे तुमच्या गळ्यातील मंगळसूत्र आमच्याकडे द्या, आम्ही ते सुखरूप ठेवतो असे त्यांनी सांगितले. यावेळी भेदरलेल्या अवस्थेत त्या महिलेने आपल्या गळ्यातील मंगळसूत्र काढून संबंधित दोघा युवकांकडे सुपूर्द केले. मंगळसूत्र हातात पडताच त्या दोघांनी तात्काळ घटनास्थळावरून पळ काढला. आपली फसवणूक झाल्याचे लक्षात येताच तिने आजूबाजूच्या परिसरातील लोकांना याबाबतची माहिती दिली. त्यानंतर सावंतवाडी पोलिसांना घटनास्थळी पाचारण करून अधिक तपासाला सुरुवात करण्यात आली आहे. संबंधित युवकांपैकी एकाने फुल हाताचे आणि चॉकलेटी रंगाचे टी-शर्ट घातले होते. आता परिसरातील सीसीटीव्ही फुटेजच्या आधारे पोलीस चोरट्यांपर्यंत पोहोचण्याचा प्रयत्न करीत आहेत.
