आचरा (प्रतिनिधी): शालेय शिक्षण व साक्षरता विभागशिक्षण मंत्रालय नवी दिल्ली, यांच्यामार्फत आयोजित राज्यस्तरीय कला उत्सव स्पर्धा दिनांक २१ नोव्हेंबर ते २३ नोव्हेंबर २०२३ या कालावधीत महात्मा फुले सभागृह, राज्य शैक्षणिक संशोधन प्रशिक्षण संस्था पुणे येथे संपन्न झाल्या. या स्पर्धेमध्ये वराडकर हायस्कूल व कनिष्ठ महाविद्यालय कट्टाचे चार विद्यार्थी सहभागी झाले होते. या स्पर्धेत श्रेया समीर चांदरकर हिने त्रिमित शिल्प प्रकारात तर सानिया अनिल कुडतरकर हिने खेळणी बनवणे या प्रकारात राज्यस्तरावर प्रथम क्रमांक प्राप्त केला. तसेच अवधूत वैभव आचरेकर या विद्यार्थ्यांने पारंपारिक नृत्य व मिथिल महेश आंगचेकर याने त्रिमित शिल्प या प्रकारात राज्यस्तरावर तृतीय क्रमांक प्राप्त केला. दिल्ली येथे होणाऱ्या राष्ट्रीय स्पर्धेमध्ये निवड झालेल्या एकूण वीस विद्यार्थ्यांमध्ये वराडकर हायस्कूल व कनिष्ठ महाविद्यालय कट्टाच्या दोन विद्यार्थिनींचा समावेश आहे. त्याचबरोबर सर्वाधिक पारितोषिक मिळवणारी वराडकर हायस्कूल व कनिष्ठ महाविद्यालय कट्टा ही राज्यातील एकमेव शाळा ठरली. या विद्यार्थ्यांना कलाशिक्षक श्री समीर अशोक चांदरकर, सहाय्यक शिक्षक भूषण गावडे, तसेच नृत्यदिग्दर्शक अरविंद वराडकर यांचे मार्गदर्शन लाभले. कट्टा पंचक्रोशी शिक्षण प्रसारक मंडळ कट्टाचे अध्यक्ष श्री अजयराज वराडकर, उपाध्यक्ष श्री आनंद वराडकर,श्री शेखर पेणकर, सचिव श्री सुनील नाईक व श्रीमती विजयश्री देसाई,शालेय समिती अध्यक्ष श्री सुधीर वराडकर व सर्व संचालक मंडळ तसेच वराडकर हायस्कूल कट्टाचे मुख्याध्यापक श्री संजय नाईक व सर्व शिक्षक वृंद यांनी यशस्वी विद्यार्थ्यांचे अभिनंदन केले व पुढील स्पर्धेसाठी शुभेच्छा दिल्या.
राज्यस्तरीय कला उत्सव स्पर्धेत वराडकर हायस्कूल व कनिष्ठ महाविद्यालय कट्टा चे वर्चस्व
