फोंडाघाट (प्रतिनिधी) : वैभववाडी तालुक्यातील लोरे नं 2 गावातील सुतार कुटुंबियांचा त्रैवार्षिक भवानी देवीचा गोंधळ शुक्रवार 2 फेब्रुवारी रोजी कै. गजानन सुतार यांच्या लोरे नं 2 सुतारवाडी येथे आयोजित करण्यात आला असून यानिमित्त विविध धार्मिक कार्यक्रमांचे आयोजन करण्यात आले आहे. शुक्रवार 2 फेब्रुवारी रोजी सकाळी 11 वाजता श्रीभैरीदेवी पूजन, सायंकाळी 5 वाजता देवीचा जोगवा, 7 वाजता दिवटी पेटवणे, 8 वाजता ओटी भरणे, 9 वाजता महाप्रसाद, रात्री 12 वाजता गोंधळी कथा सादर होणार आहे. 3 फेब्रुवारी रोजी रात्री 9 वाजता सांस्कृतिक कार्यक्रम सादर होतील. 3 फेब्रुवारी रोजी सत्यनारायण महापूजा आयोजित करण्यात आली असून भाविकांना महाप्रसाद देण्यात येणार आहे. रात्री 9 वाजता मान्यवरांचा सत्कार सोहळा असून रात्री 10 वाजता दशावतारी नाटक सादर होणार आहे.उपस्थित राहण्याचे आवाहन नवतरुण भजन ( नाट्य ) मंडळ, सुतारवाडी, लोरे नं 2 यांनी केले आहे.
