ठाणे (न्यूज ब्युराे) : संपूर्ण देश ढवळून निघालेल्या बदलापूर प्रकरणात मोठी बातमी समोर आली आहे. बदलापुरातील एका शाळेत दोन चिमुरडींचं लैंगिक शोषण करणारा आरोपी अक्षय शिंदे याचा एन्काऊंटर झाल्याची मोठी अपडेट समोर आली आहे. आरोपी अक्षय शिंदे याला रिमांडमध्ये घेऊन जात असताना तो पोलिसांची पिस्तुल हिसकावून त्यांच्यावर गोळ्या झाडण्याचा प्रयत्न करीत होता. त्याच वेळी स्वसंरक्षणासाठी पोलिसांनी अक्षय शिंदेवर गोळीबार केल्याची माहिती समोर आली आहे.
आतापर्यंत अक्षय शिंदे याने आत्महत्या केल्याचं सांगितलं जात होतं. मात्र आताच हाती आलेल्या बातमीनुसार त्याचा एन्काऊंटर करण्यात आल्याचं स्पष्ट झालं आहे. पोलिसांनी स्वसंरक्षणासाठी त्याच्यावर गोळ्या झाडल्याची माहिती आहे.
ठाणे पोलिसांना अक्षय शिंदे याची ट्रान्झिट रिमांड मिळाली होती. तळोजा तुरुंगातून त्याला ठाणे पोलीस घेऊन जात होते. मुंब्रा आणि कळव्याच्या दरम्यान अक्षयने पोलिसांकडील रिव्हॉल्व्हर हिसकावून घेत पोलिसांवर गोळीबार केला असे म्हटले जात आहे. पोलिसांनी स्वसंरक्षणार्थ अक्षयवर गोळ्या झाडल्या ज्यात त्याचा मृत्यू झाला.
