आचरा (प्रतिनिधी) : मालवण तालुक्यातील, श्री जयंतीदेवी मंदिर, पळसंब येथे आपली सिंधुनगरी न्यूज चॅनेलच्या ‘आकाश कंदील २०२५’ डिजीटल दिवाळी विशेष अंकाचे प्रकाशन सामाजिक व राजकीय कार्यकर्ते तसेच माजी सरपंच आणि श्री जयंतीदेवी सांस्कृतिक कला क्रीडा मंडळ, पळसंब संस्थेचे सचिव चंद्रकांत गोलतकर यांच्या हस्ते करण्यात आले. श्री देवी जयंती चरणी प्रार्थनेसह पुष्पहार अर्पण करुन कार्यक्रमाचा शुभारंभ करण्यात आला. यावेळी व्यासपीठावर उद्घाटक चंद्रकांत गोलतकर यांच्यासह ज्येष्ठ साहित्यिका वैशाली पंडित, आकाश कंदील दिवाळी विशेष अंकाचे संकल्पक ॲड. सहिष्णू पंडित, रचना संयोजन प्रमुख अमिया बांदेकर व कार्यकारी संकलन प्रमुख सानिका वायंगणकर उपस्थित होते.
यावेळी ॲड. सहिष्णू पंडित यांनी ‘आकाश कंदील २०२५’ दिवाळी अंकाच्या निर्मितीमागील संकल्पना स्पष्ट केली. तसेच यावेळी चंद्रकांत गोलतकर यांनी आपली सिंधुनगरी न्यूज चॅनेल व आकाश कंदील अंकाच्या टीमची प्रशंसा केली आणि वाचकांसाठी ही एक उपयुक्त दिवाळी भेट असल्याचे सांगितले. आपली सिंधुनगरी न्यूज चॅनेलच्या पुढील वाटचालीसाठी त्यांनी संबंधित सर्वांना सदिच्छा दिल्या.
ज्येष्ठ साहित्यिक वैशाली पंडित यांनी मार्गदर्शन करताना सांगितले की वाचनाद्वारे कोकणची संस्कृती समजून घेताना कोकणच्या भूमीविषयी आपली पूजनीय कृतज्ञता वाढत राहील. युवा पिढीने पुढाकार घेऊन साकार केलेल्या आकाश कंदील २०२५ च्या सहकारी सदस्यांना त्यांनी यापुढील अंकात विविध विषय व लेखनाचे प्रकार अंकात समाविष्ट करावे असे सूचित केले. दिवाळी विशेषांकाचे संकल्पक ॲड. सहिष्णू पंडित, ॲड. अमिया बांदेकर व सानिका वायंगणकर यांनी त्यांचे मनोगत व्यक्त केले आणि यंदाच्था अंकाच्या निर्मितीचा व मागील अंकाच्या प्रतिक्रियांचा आढावा घेतला .
‘आकाश कंदील २०२५’ दिवाळी अंकाला ज्येष्ठ कलाकर्मी व कोकणातील मुंबईस्थित ज्येष्ठ साहित्यिक तसेच पळसंब गावचे समाजसेवी गिरीधर पुजारे यांची प्रस्तावना लाभली आहे. यामध्ये नितीन गावडे, निता सावंत, महेक शेख, श्रावणी गावडे, आदिती मसुरकर, डॉ. वैदेही दप्तरदार, स्नेहा नारिंगणेकर आणि अनुष्का रेवंडकर यांचे लेख समाविष्ट आहेत.
यावेळी देवस्थान मानकरी अरुण पुजारे यांच्याकडून ‘भगवतगीता’ पुस्तक मंदिरातील वाचनालयाला देण्यात आले. तसेच ज्येष्ठ साहित्यिक वैशाली पंडित यांनी त्यांची ‘दीपमाळेची फुले’ व डॉ. प्रशांत पटवर्धन यांचे ‘नवनिर्मितीचे ऋषी परशुराम’ ही पुस्तकं जयंती देवी वाचनालयाला भेट दिली.
यावेळी प्रमुख मान्यवरांसह आपली सिंधुनगरी न्यूज चॅनेल समूहाच्या संचालक सौ. फिलोमीना पंडित, मंडळाचे उपाध्यक्ष अमरेश पुजारे, देवस्थान मानकरी अरुण पुजारे, राजन पुजारे, गणेश पुजारे, भजनी बुवा अनिल परब, अमित पुजारे, दादा पुजारे, अशोक जुवेकर, दाजी जुवेकर, रुपेश पुजारे, मोर्वेकर, आशा सेविका तनुजा परब आदी ग्रामस्थ उपस्थित होते.
‘आकाश कंदील २०२५’ हा डिजीटल अंक आपली सिंधुनगरी न्यूज चॅनेलच्या पोर्टलवर प्रत्येक बातमी व लेखाला डिजीटली जोडलेला आहे.
