वैभववाडी (प्रतिनिधी) : वैभववाडी शहरातील पुर्वबाजारपेठ येथील भानुदास दामोदर तावडे यांच्या हॉटेलमधील १५ हजार रूपये किंमतीचा टीव्ही शुक्रवारी रात्री चोरीस गेला. दरम्यान घटनास्थळी आणलेले श्वान शहरातील एका खाजगी इमारतीनजीक जाऊन घुटमळले. चोरटा परप्रांतीय असावा, असा पोलीसांचा अंदाज आहे.
तावडे यांचे वैभववाडी-सडुरे मार्गानजीक हॉटेल आहे. काल रात्री साडेबारा वाजेपर्यत ते हॉटेलमध्ये होते. त्यानंतर लगत असलेल्या घरांमध्ये ते गेले असता त्यांनी नेहमीप्रमाणे हॉटेलला असलेला साधा दरवाजा बंद करून घेतला. आज सकाळी साडेआठ वाजता ते हॉटेलमध्ये आले असता त्यांना टीव्ही चोरीस गेल्याचे लक्षात आले. त्यांनी तत्काळ पोलीसांना ही माहिती दिली. त्यानंतर पोलीस निरीक्षक फुलचंद मेंगडे हे घटनास्थळी गेले. त्यानंतर गुन्हा अन्वेषण पथक, ठसे तज्ञ पथक देखील वैभववाडीत दाखल झाले. याशिवाय श्वानपथक देखील घटनास्थळी आले. श्वान शहरातील एका खाजगी इमारतीनजीक जाऊन घुटमळले. अज्ञात चोरटा हा परप्रांतीय असण्याचा प्राथमिक अंदाज पोलीसांकडून व्यक्त केला जात आहे. या चोरी प्रकरणाचा तपास वैभववाडी पोलीस करीत आहेत.
