खारेपाटण (प्रतिनिधी) : सिंधुदुर्ग जिल्ह्यात काही महिन्यापूर्वी तोक्ते चक्रीवादळ झाल्यापासून आंबा बागेत फळमाशीचा प्रादुर्भाव मोठया प्रमाणात झाल्याचे आढळून आले आहे.आंबा फळमाशीचा वाढता प्रादुर्भाव लक्षात घेता आंब्याची प्रत घसरली असून विक्री व्यवस्थेवर त्याचा विपरीत परिणाम होऊन आंबा बागायतदारांचे मोठे आर्थिक नुकसान होत आहे.हे आर्थिक नुकसान लक्षात घेता सिंधुरत्न समृद्ध योजना अंतर्गत आंबा पिकावरील फळमाशीचे सामूहिकपणे नियंत्रण करण्यासाठी ७५ टक्के अनुदानावर प्रति हेक्टरी ४ फेरोमोन सापळे आणि ४ लुर्स अनुदानावर देण्यात येणार असल्याची माहिती देवगड तालुका कृषी अधिकारी श्री कैलास ढेपे यांनी प्रसिद्धीपत्रकाद्वारे दिली आहे.
सदरचे फेरोमोन सापळे आणि लुर्स हे आंबा बागायतदारांनी सामूहिकपणे आपल्या आंबा बागेत लावायचे आहे,जेणेकरून सामूहिक स्वरूपात फळमाशीचा प्रादुर्भाव कमी होऊन फळमाशीचे नियंत्रण आटोक्यात येण्यासाठी मदत होईल.प्रस्तुत फेरोमोन सापळे आणि लुर्स ची मागणी करण्यासाठी आपले गावाचे संबंधित कृषी सहाय्यक यांना संपर्क करून त्यांचेकडे आपला मागणी अर्ज सादर करावा.या अर्जासोबत सातबारा उतारा जोडणे आवश्यक आहे. तरी सर्व आंबा बागायतदारांनी आपण व आपल्या परिसरातील सर्व आंबा बागायतदार यांना फेरोमोन सापळे व लुर्स ची मागणी करणेसाठी अर्ज करणे बाबत अवगत करावे. जेणेकरून आंबा बागेच्या १०० % क्षेत्रावर सामूहिकपणे फेरोमोन सापळे आणि लुर्स चा वापर केल्यास फळमाशीचे नियंत्रण करणे सोपे होईल. यासाठी सर्व आंबा बागायतदारानी या योजनेचा लाभ घ्यावा.असे आवाहन देखील तालुका कृषी अधिकारी कैलास ढेपे यांनी केले आहे.
