सिंधुदुर्ग (प्रतिनिधी) : सिंधुदुर्ग, रत्नागिरी आणि पश्चिम महाराष्ट्रात हाऊसफुल प्रयोगांची मालिका रचत रसिकांची मने जिंकणारे भव्य ऐतिहासिक महानाट्य ‘शिवराज भूषण’ आता देशाच्या राजधानीत आपल्या कर्तृत्वाचा ठसा उमटविण्यास सज्ज झाले आहे. छत्रपती शिवाजी महाराज आणि महाकवी कविराज भूषण यांच्या अनोख्या ऐतिहासिक नात्यावर आधारित हे महानाट्य २ सप्टेंबर २०२६ रोजी नवी दिल्लीतील प्रतिष्ठित जवाहरलाल नेहरू युनिव्हर्सिटी (JNU)च्या प्रांगणात सादर होणार आहे.
कोकणच्या मातीतून दिल्लीच्या रंगभूमीवर ऐतिहासिक झेप
सिंधुदुर्ग जिल्ह्यातील तब्बल ७० प्रतिभावंत स्थानिक कलाकारांच्या अभिनय, नृत्य आणि प्रभावी सादरीकरणातून ‘शिवराज भूषण’ची निर्मिती झाली आहे. कोकण आणि पश्चिम महाराष्ट्रातील विविध प्रयोगांना रसिकांचा उत्स्फूर्त प्रतिसाद मिळाल्यानंतर आता हेच कलाकार दिल्लीच्या भूमीवर छत्रपती शिवाजी महाराजांचा जाज्वल्य इतिहास आणि कविराज भूषण यांच्या ओजस्वी काव्याचा संगम सादर करणार आहेत.
या महानाट्यातून शिवकालीन इतिहासातील एका विलक्षण पर्वाला रंगमंचावर भव्य स्वरूप देण्यात आले आहे. छत्रपती शिवाजी महाराज आणि महाकवी कविराज भूषण यांच्यातील अलौकिक संबंध, स्वराज्याची प्रेरणा आणि शिवचरित्राचे तेजस्वी दर्शन या सादरीकरणातून घडणार आहे.
दिल्लीतील रसिकांमध्ये उत्सुकता
‘शिवराज भूषण’च्या दिल्लीतील प्रयोगामुळे महाराष्ट्राच्या सांस्कृतिक वैभवाला राष्ट्रीय व्यासपीठ मिळणार असून, कोकणातील कलाकारांच्या प्रतिभेचीही राजधानीत दखल घेतली जाणार आहे. या ऐतिहासिक प्रयोगासाठी दिल्लीतील रसिक, इतिहास अभ्यासक आणि शिवप्रेमींमध्ये मोठी उत्सुकता निर्माण झाली आहे.
दिनांक : २ सप्टेंबर २०२६
स्थळ : जवाहरलाल नेहरू युनिव्हर्सिटी (JNU), नवी दिल्ली
कोकणच्या मातीत घडलेली कला, शिवरायांच्या इतिहासाची प्रेरणा आणि कविराज भूषणांच्या ओजस्वी शब्दांचा संगम असलेले ‘शिवराज भूषण’ हे महानाट्य दिल्लीच्या भूमीवर महाराष्ट्राच्या सांस्कृतिक अस्मितेचा जागर घडविणारे अभिमानाचे पर्व ठरणार आहे.
