वैभववाडी (प्रतिनिधी) : तालुक्यातील होतकरू गरजू सुशिक्षित बेरोजगार युवक-युवतींना रोजगाराच्या संधी उपलब्ध करून देण्यासाठी अशा उपक्रमांची गरज आहे. शासनाच्या माध्यमातून आयोजित करण्यात आलेल्या या रोजगार मेळाव्याचा जास्तीत जास्त युवकांनी लाभ घ्यावा, असे प्रतिपादन पंचायत समिती वैभववाडीचे सभापती सिद्धेश रावराणे यांनी केले.
शहीद विजय साळसकर शासकीय औद्योगिक प्रशिक्षण संस्था, वैभववाडी आणि श्री अनगरसिद्ध खाजगी औद्योगिक प्रशिक्षण संस्था, सांगुळवाडी यांच्या संयुक्त विद्यमाने पंडित दीनदयाळ उपाध्याय विश्वविक्रमी महाकुंभ रोजगार मेळाव्याचे आयोजन सांगुळवाडी येथे करण्यात आले.
या रोजगार मेळाव्याचे उद्घाटन पंचायत समिती वैभववाडीचे सभापती सिद्धेश रावराणे तसेच वैभववाडी भारतीय जनता पार्टीचे तालुकाध्यक्ष सुधीर नकाशे यांच्या शुभहस्ते करण्यात आले.
या मेळाव्यास पंचायत समिती वैभववाडीच्या उपसभापती साची कोलते, जिल्हा परिषद सदस्य प्रमोद राणे, पंचायत समिती सदस्या सुवर्णा संसारे, राजेंद्र राणे, संस्थेचे संदीप पाटील यांच्यासह विविध मान्यवर उपस्थित होते.
शासनाच्या वतीने राबविण्यात येत असलेल्या या उपक्रमातून वैभववाडी तालुक्यातील अनेक सुशिक्षित बेरोजगार युवक-युवतींना रोजगाराच्या संधी उपलब्ध होणार आहेत. त्यामुळे रोजगाराच्या शोधात असलेल्या तरुणांसाठी हा मेळावा महत्त्वपूर्ण ठरला.
तालुक्यातील युवक-युवतींना त्यांच्या कौशल्य आणि शैक्षणिक पात्रतेनुसार रोजगाराच्या संधी मिळाव्यात, यासाठी अशा प्रकारचे उपक्रम सातत्याने राबविणे आवश्यक असल्याचे यावेळी उपस्थित मान्यवरांनी सांगितले. रोजगार मेळाव्याच्या आयोजनाबद्दल सभापती सिद्धेश रावराणे यांनी समाधान व्यक्त केले.
