राष्ट्रगीताचा जयघोष करत पुन्हा एकदा सर्वत्र शाळा गजबजल्या
विद्यार्थ्यांवर पुष्पवृष्टी व विद्यार्थ्यांना पाठ्यपुस्तकांचे करण्यात आले वाटप
वैभववाडी (प्रतिनिधी) : मे महिन्याच्या प्रदिर्घ सुट्टीनंतर आज १५ मे रोजी राज्यातील शाळा आजपासून पुन्हा जोमाने सुरु झाल्यात. शाळेच्या पहिल्या दिवशी सर्वत्र विद्यार्थ्यांचं ढोल ताशांच्या गजरात जंगी स्वागत करण्यात येत आहे. काही शाळांमध्ये विद्यार्थ्यांना चॉकलेट्स तर काही शाळांमध्ये विद्यार्थ्यांना फुलं देत, त्यांचं स्वागत करण्यात येत आहे. प्रदिर्घ सुट्टी नंतर विद्यार्थी व शिक्षक, मित्र -मैत्रिणी यांच्या भेटीमुळे शालेय परिसर पुन्हा एकदा गजबजून गेला आहे. या शैक्षणिक वर्षापासून नवीन शैक्षणिक धोरण तसेच एक राज्य एक गणवेश, आनंददायी शनिवार अशा योजना शासनामार्फत राबविण्यात येणार आहेत. शाळेच्या पहिल्याच दिवशी वैभववाडी तालुका शिक्षण संस्थेचे कार्याध्यक्ष जयेंद्र रावराणे यांच्या हस्ते विद्यार्थ्यांना मोफत पाठ्यपुस्तकांचे वाटप देखील करण्यात आले. नवीन गणवेश, नवीन शैक्षणिक साहित्य, पाठ्यपुस्तके यांमुळे विद्यार्थांमध्ये आनंदायी वातावरण पहायला मिळत आहे. यावेळी कार्याध्यक्ष जयेंद्र रावराणे, मुख्याध्यापक बी.एस.नादकर, उच्च माध्यमिक विभाग प्रमुख सावंत पी.जे., माध्यमिक विभाग प्रमुख पाटील एस.एस. सर्व शिक्षक शिक्षकेत्तर कर्मचारी व विद्यार्थी पालक मोठ्या संख्येने उपस्थित होते.
