खारेपाटण (प्रतिनिधी) : कणकवली तालुक्यातील नडगिवे धुरिभाटले वाडी येथील श्री महालक्ष्मी छाया क्रीडा व्यायाम मंडळाच्या सुवर्ण महोत्सवी वर्षा निमित्त आयोजित करण्यात आलेल्या कार्यक्रमानिमित्त मंडळाची स्मरणिका आणि दिनदर्शिका प्रकाशन सोहळा मोठ्या उत्साहात व ग्रामस्थांच्या उपस्थितीत नुकताच नडगिवे येथे मान्यवरांच्या उपस्थितीत संपन्न झाला.
नडगिवे गावामध्ये सामाजिक, सांस्कृतिक,शैक्षणिक व धार्मिक क्षेत्रात समाजकार्य व्हावे या हेतूने १९७४ साली या मंडळाची स्थापना लालबाग,मुंबई येथील एका छोट्याशा जागेत करण्यात आली. गेली पन्नास वर्षे या मंडळाच्या माध्यमातून समाजामध्ये उल्लेखनीय सामाजिक कार्य मंडळाचे अध्यक्ष व पदाधिकारी यांच्या माध्यमातून होत आहे. मंडळाच्या सुवर्ण महोत्सवी वर्षानिमित्त आयोजित करण्यात आलेल्या कार्यक्रमांमध्ये मंडळाचे अध्यक्ष पंढरीनाथ गुळेकर, कार्याध्यक्ष सूर्यकांत आंबेरकर, राजन मांजरेकर,आनंद पाटील, महेश मांजरेकर,विलास करंगुटकर, प्रवीण मोरये, सुदर्शन मांजरेकर, गुरुनाथ पाटील व मंडळाचे सर्व पदाधिकारी यांच्या हस्ते शैक्षणिक क्षेत्रामध्ये कार्यरत असणाऱ्या मान्यवरांचा विशेष सत्कार मंडळाच्या वतीने करण्यात आला.
या कार्यक्रमाला खारेपाटण पंचक्रोशी शिक्षण प्रसारक मंडळाचे अध्यक्ष प्रवीण लोकरे, उपाध्यक्ष भाऊ राणे,सहसचिव राजेंद्र वरूणकर, संचालक प्रशांत गुळेकर व संस्थेचे सर्व संचालक,शेठ न.म. विद्यालयाचे प्राचार्य संजय सानप व पर्यवेक्षक संतोष राऊत आदी प्रमुख मान्यवर उपस्थित होते. खारेपाटण शिक्षण संस्थेचे अध्यक्ष प्रवीण लोकरे यांच्या शुभहस्ते मंडळाच्या वतीने सुवर्ण महोत्सवी वर्षानिमित्त काढण्यात आलेल्या स्मरणिकेचे प्रकाशन तसेच दिनदर्शिकेचा शुभारंभ करण्यात आला.यावेळी उपस्थित सर्व मान्यवरांचा मंडळाच्या वतीने सन्मानचिन्ह व पुष्पगुच्छ देऊन गौरविण्यात आले.
