महिलांचा सन्मान फक्त महिला दिनी न राहता कायम त्यांचा आदर राखला पहिजे ; सरपंच भुषण पोकळे
देवगड (प्रतिनिधी) : समाज हा परिवर्तनशिल असतो आपण महिलांविषयी आपले विचार आणि दृष्टीकोन बदलला तर स्त्री पुरुष असा भेदभाव राहणार नाही. महिलांची प्रत्येक क्षेत्रामध्ये कर्तुत्ववान भरारी हि गावाबरोबरच देशाला यश मिळवून देणारी आहे. महिलांचा सन्मान हा महिला दिना दिवशी न राहता कायम त्यांचा आदर राखला पाहिजे. असे मत पडेल गावचे सरपंच भुषण पोकळे यांनी व्यक्त केले.
पडेल ग्रामपंचायतीच्यावतीने जागतिक महिला दिनाचे औचित्य साधून अनेक कार्यक्रमांचे आयोजन करण्यात आले होते. यावेळी माजी सरपंच विकास दिक्षित, पडेल मंडळाचे भाजपा अध्यक्ष बंडया नारकर, उपसरपंच विश्वनाथ पडेलकर, अंकुश टुकरुल, वैभव वारीक, संजय मुळम, पडेल मुख्याध्यापक हिराचंद तानावडे, डॉ.आरोहि दिक्षित, डॉ.पुजा मालपेकर, सर्व ग्रामपंचायत सदस्य व गावातील महिला व ग्रामस्थ उपस्थित होते.
यावेळी महिलांसाठी रस्सीखेच स्पर्धा,खो-खो स्पर्धा,रांगोळी स्पर्धा सांस्कृतिक कार्यक्रमाचे आयोजन करण्यात आले होते. या कार्यक्रमाला महिलांनीदेखील मोठया प्रमाणात उपस्थिती दर्शवून स्पर्धेमध्ये सहभाग घेतला होता. या स्पर्धा उत्साहात पार पडल्या. पडेल ग्रामपंचायतीने यापुर्वी देखील अनेक नाविन्यपुर्ण उपक्रम राबविले आहेत.
यावेळी पुढे बोलताना सरपंच भुषण पोकळे म्हणाले कि, गावच्या विकासासाठी महिलांचे योगदान हे मोठे असते. शासनाकडुन आलेल्या अनेक योजनांची अंमलबजावणी गावचे नागरिक म्हणून महिला प्रथम करीत असतात. बचत गटाच्या माध्यमातून महिलांना आपली आर्थीक उन्नती साधण्यासाठी एक साधन निर्माण झाले आहे. या बचत गटांना प्रोत्साहित करण्यासाठी पडेल ग्रामपंचायत हि नेहमीच सहकार्य करीत असते. गावचा विकास करीत असताना महिलांना केंद्रबिंदु ठरवुन विकास आराखडा आम्ही नेहमीच तयार करतो. कारण गावाला विकासाच्या प्रवाहात आणण्यासाठी महिलांचे योगदान हे मोठे असल्याचे त्यांनी सांगितले.
