करूळ घाटात एसटी बसची बंद ट्रेलरला धडक; चालक, वाहकासह ४ ते ५ जण जखमी

वैभववाडी (प्रतिनिधी) : करूळ घाटातील अवघड वळणावर बंद पडलेल्या ट्रेलरला देवगड-पुणे एसटी बसने शनिवारी रात्री पावणे नऊच्या सुमारास मागून धडक दिली. या अपघातात एसटी चालक व वाहकासह तीन ते चार प्रवासी किरकोळ जखमी झाले. याबाबत वाहक अभिजीत एकनाथ वरुटे रा.देवगड आगार यांनी वैभववाडी पोलिसात तक्रार दिले असून चालक परमानंद दत्तू मेश्राम रा. देवगड आगार याच्यावर गुन्हा दाखल करण्यात आला आहे.

देवगड आगारातून सायंकाळी साडेपाच वाजता पुण्याकडे निघालेल्या एसटी बसमध्ये सुमारे ३० प्रवासी होते. करूळ चेकपोस्टपासून सुमारे पाच किलोमीटर अंतरावर अवघड वळणावर दोन दिवसांपासून ट्रेलर बंद अवस्थेत उभा होता. या ठिकाणी एसटी चालक परमानंद दत्तू मेश्राम यांचे बसवरील नियंत्रण सुटल्याने बसची ट्रेलरला मागून धडक झाली.धडकेत चालक  मेश्राम, वाहक अभिजीत एकनाथ वरुटे तसेच तीन ते चार प्रवाशांना किरकोळ दुखापत झाली. घटनेची माहिती मिळताच वैभववाडी पोलिस ठाण्याचे हवालदार हरीश जायभाय व राहुल तळसकर यांनी घटनास्थळी धाव घेतली. अपघातामुळे काही काळ वाहतूक विस्कळीत झाली होती. पंचनामा करून पोलिसांनी वाहतूक सुरळीत केली. या प्रकरणी चालक परमानंद मेश्राम यांच्याविरुद्ध रस्त्याच्या परिस्थितीकडे दुर्लक्ष करून वाहन चालवून अपघात केल्याप्रकरणी गुन्हा दाखल करण्यात आला आहे. अधिक तपास वैभववाडी पोलिस करीत आहेत.

error: Content is protected !!