श्री सदस्यांचा स्त्युत उपक्रम
तळेरे (प्रतिनिधी): डॉ नानासाहेब धर्माधिकारी प्रतिष्ठान, अलिबाग, रेवदंडा यांच्यावतीने स्वच्छता हीच देशसेवा समजून महात्मा गांधी यांच्या जयंतीचे औचित्य साधून कणकवली तालुक्यातील कासार्डे माध्यमिक विद्यालयाच्या परिसरात स्वच्छता अभियान राबविले. रविवारी पाऊसचा जोर मोठ्या प्रमाणात असतानाही भरपावसात भिजत श्री सदस्यांनी ही स्वच्छता मोहीम राबवली. त्यांचा निर्धार निश्चितच कौतुकास्पद होता. नानासाहेब धर्माधिकारी प्रतिष्ठानतर्फे प्रत्येक समाजात ठिकठिकाणी समाज प्रबोधनाचे काम केले जाते. आठवड्यातून एकदा नियमित दिवशी,नियमित वेळी,महिला,पुरुष व मुले आपली दैनंदिन कामे हातावेगळी करून बैठकीकडे धाव घेत असतात. किंबहुना त्यांना श्रवणाची ओढ लागलेली असते. श्रीमत दासबोधाचे पारायण व निरूपणाच्या माध्यमातून अबालवृद्ध सुसंस्कारित होत आहेत. या बैठकांच्या माध्यमातून विविध सामाजिक उपक्रमही राबविले जातात. या माध्यमातून वेळोवेळी सार्वजनिक ठिकाणांची स्वच्छता केली जाते. त्याप्रमाणे यंदा कासार्डे हायस्कूलच्या परिसराची स्वच्छता करण्यात आली. यावेळी बैठकीचे सदस्य कोयते, झाडू,फावडी, घमेली घेऊन मोठ्या संख्येने उपस्थित होते. भर पावसात भिजूनही श्री सदस्यानी पूर्ण परिसर स्वच्छ केला.
