चौके (प्रतिनिधी) : नुकत्याच पार पडलेल्या ‘गुरुकुल प्रज्ञाशोध’ या राज्यस्तरीय स्पर्धा परीक्षेत जिल्हा परिषद प्राथमिक शाळा, पराड ता. मालवण येथील विद्यार्थ्यांनी घवघवीत यश संपादन करून शाळेच्या शिरपेचात मानाचा तुरा रोवला आहे. या परीक्षेत शाळेतील विद्यार्थ्यांनी राज्य आणि जिल्हा स्तरावर आपले वर्चस्व सिद्ध केले आहे.
यशस्वी विद्यार्थ्यांची कामगिरी : शाळेतील चिमुकल्यांनी स्पर्धा परीक्षेत आपल्या बुद्धिमत्तेची चुणूक दाखवत खालीलप्रमाणे यश मिळवले आहे.
कु. अपेक्षा प्रतिमकुमार येडूरे (इयत्ता दुसरी): १०० पैकी ९४ गुण मिळवून राज्यात चौथा आणि सिंधुदुर्ग जिल्ह्यात प्रथम क्रमांक पटकावला. कु. तेजस आंबेरकर (इयत्ता दुसरी): ८४ गुण मिळवून राज्यात नववा आणि सिंधुदुर्ग जिल्ह्यात चौथा क्रमांक मिळवला. शिवम कालकुंद्रीकर (इयत्ता तिसरी) : ३०० पैकी २१० गुण मिळवून मालवण केंद्रात प्रथम येण्याचा मान मिळवला. तसेच इयत्ता दुसरीमधील आरोही (६६ गुण), सानवी (६२ गुण), निनाद (५० गुण), आर्वी (४८ गुण) या विद्यार्थ्यांनीही यश संपादन केले. याशिवाय रुद्र, नव्या, कार्तिक, तनवीर, आरव, आदित्य, वेदांत आणि पार्थ या विद्यार्थ्यांनी परीक्षेत उत्तम सहभाग नोंदवत कौतुकास्पद प्रयत्न केले.
मार्गदर्शन आणि कौतुक : विद्यार्थ्यांच्या या यशामागे शाळेचे मुख्याध्यापक कृष्णा कालकुंद्रीकर सर आणि सहशिक्षिका शितल पाटील मॅडम यांचे मोलाचे मार्गदर्शन लाभले. शिक्षकांच्या कष्टाचे आणि विद्यार्थ्यांच्या जिद्दीचे सर्व स्तरांतून कौतुक होत आहे. या यशाबद्दल शाळा व्यवस्थापन समिती, शतक महोत्सव समिती आणि पराड ग्रामस्थ यांनी विद्यार्थ्यांचे अभिनंदन केले असून त्यांच्या पुढील शैक्षणिक वाटचालीस भरभरून शुभेच्छा दिल्या आहेत. ग्रामीण भागातील विद्यार्थ्यांनी राज्यस्तरावर मिळवलेल्या या यशामुळे पराड गावाचे नाव सर्वत्र गाजत आहे.
अपेक्षा येडूरे राज्यात चौथी
तेजस आंबेरकर राज्यात नववा
