बांदा (प्रतिनिधी) : इन्सुली डोबाशेळ येथील श्री संत सोहिरोबानाथ आत्मसाक्षात्कार मंदिर येथे वैशाख शुद्ध पौर्णिमेला शुक्रवारी संत सोहिरोबानाथांचा साक्षात्कार दिन सोहळा मोठ्या उत्साहात आणि भक्तिमय वातावरणात साजरा करण्यात आला. यानिमित्त विविध धार्मिक कार्यक्रम आयोजन करण्यात आले होते. पहाटे काकड आरतीने सोहळ्याचा आरंभ झाला. त्यानंतर श्रींच्या पादुकांची अभिषेक पुजा तसेच श्री सत्यनारायण महापूजा झाली. दुपारी महाआरती व महाप्रसाद झाला. सायंकाळी विविध मंडळांच्या सुश्राव्य भजनांचा कार्यक्रम झाला. त्यानंतर ढोलताशांच्या गजरात, शेकडो भाविकांच्या उपस्थितीत गजर, नामघोष करीत श्री संत सोहिरोबानाथांचा पालखी सोहळा संपन्न झाला व आरती करून प्रसाद वाटण्यात आला. रात्री आजगांवकर पारंपरिक दशावतार नाट्यमंडळाचा तिरुपती बालाजी हा नाट्यप्रयोग सादर करण्यात आला. श्री संत सोहिरोबानाथ सेवा समिती इन्सुली,उत्कर्ष युवक कला क्रीडा व व्यायाम मंडळ,इन्सुली व भक्तमंडळीच्यावतीने या सोहळ्याचे उत्तम नियोजन करण्यात आले होते. हजारो भाविकांनी या सोहळ्यास उपस्थिती दर्शवून नाथ दर्शनाचा लाभ घेतला.
