मराठे कृषी महाविद्यालयात कृषिदिन उत्साहात साजरा

फोंडाघाट (प्रतिनिधी) : दि. १ जुलै २०२६ राजाराम मराठे कृषी महाविद्यालय, फोंडाघाट येथे आज कृषी दिन उत्साहपूर्ण वातावरणात साजरा करण्यात आला. राष्ट्रीय सेवा योजना (NSS) व महाविद्यालयाच्या संयुक्त विद्यमाने आयोजित करण्यात आलेल्या या कार्यक्रमात विद्यार्थी, प्राध्यापक व शिक्षकेतर कर्मचाऱ्यांचा उत्स्फूर्त सहभाग लाभला. कार्यक्रमाची सुरुवात मान्यवरांच्या हस्ते वृक्षारोपण करून करण्यात आली. “एक विद्यार्थी – एक वृक्ष” हा संदेश देत पर्यावरण संवर्धनाचे महत्त्व विद्यार्थ्यांना पटवून देण्यात आले. तसेच शेतीचे महत्त्व, नैसर्गिक साधनसंपत्तीचे संवर्धन, शाश्वत शेती पद्धती आणि आधुनिक कृषी तंत्रज्ञान याबाबत विद्यार्थ्यांना मार्गदर्शन करण्यात आले. यावेळी महाविद्यालयाचे प्राचार्य संते सर यांनी विद्यार्थ्यांना कृषी क्षेत्रातील नव्या संधींची माहिती देत पर्यावरण संरक्षण आणि शेतीविषयी सकारात्मक दृष्टिकोन ठेवण्याचे आवाहन केले. त्यांनी विद्यार्थ्यांनी समाजहिताचे उपक्रम राबवून पर्यावरण संवर्धनात आपले योगदान द्यावे, असेही सांगितले. या कार्यक्रमास महाविद्यालयातील सर्व प्राध्यापक, शिक्षकेतर कर्मचारी, राष्ट्रीय सेवा योजना स्वयंसेवक तसेच मोठ्या संख्येने विद्यार्थी उपस्थित होते. कार्यक्रमाचे यशस्वी आयोजन राष्ट्रीय सेवा योजना विभागाच्या सहकार्याने करण्यात आले.