सार्वजनिक बांधकाममंत्री छत्रपती शिवेंद्रसिंहराजे भोसले यांच्या हस्ते पुरस्कार प्रदान
सिंधुदुर्ग (प्रतिनिधी) : सार्वजनिक बांधकाम विभागात उल्लेखनीय व उत्कृष्ट कामगिरी केल्याबद्दल वरील सर्व अभियंता यांना सार्वजनिक बांधकाममंत्री शिवेंद्रसिंहराजे भोसले यांच्या हस्ते महाराष्ट्र शासन, सार्वजनिक बांधकाम विभागाच्या वतीने ‘उत्कृष्ट अभियंता पुरस्कार’ प्रदान करण्यात आला. यशवंतराव चव्हाण सेंटर मुंबई येथे मंगळवार 29 सप्टेंबर रोजी शासकीय समारंभात सन्मानपूर्वक पुरस्कार वितरण करण्यात आले.
अभियांत्रिकी क्षेत्रात कार्यरत असताना विविध शासकीय बांधकामे, रस्ते व पूल तसेच विशेषत: छत्रपती शिवाजी महाराज यांचा ९३ फूट उंचीचा पुतळा हे संवेदनशील काम व महाराष्ट्रातील नदीवर पहिला काचेचा पूल सिंधुदुर्ग जिल्ह्यातील वैभववाडी तालुक्यातील नापणे येथे बांधण्यात आला आहे. वरील दोन्ही कामे अत्यंत जबाबदारीने व गुणवत्तापूर्ण पूर्ण करण्यात योगदान दिले. सर्व कामांची गुणवत्ता, वेळेत काम पूर्ण करण्यासाठी केलेले प्रयत्न, तांत्रिक बाबींची काटेकोर अंमलबजावणी तसेच शासकीय कामकाजातील जबाबदारीची दखल घेत त्यांना हा पुरस्कार प्रदान करण्यात आला.
सार्वजनिक बांधकाम विभागातील अधिकारी व सहकाऱ्यांनी त्यांच्या या यशाबद्दल अभिनंदन केले. “हा पुरस्कार माझ्यासाठी प्रेरणादायी असून, यापुढेही सार्वजनिक हिताची कामे अधिक गुणवत्तेने व प्रामाणिकपणे करण्याची प्रेरणा मिळाली आहे,” अशा भावना कार्यकारी अभियंता, महेंद्र किणी, उपअभियंता अजित पाटील, कनिष्ठ अभियंता सुरज गिरी, शुभम दुडये व स्थापत्य अभियांत्रिकी सहाय्यक समाधान खैरनार यांनी व्यक्त केल्या.
सर्व अभियंता यांच्या या गौरवाबद्दल कुटुंबीय, मित्रपरिवार, सहकारी अधिकारी-कर्मचारी तसेच नागरिकांकडून त्यांच्यावर अभिनंदनाचा वर्षाव होत आहे.
