कुंभवडेतील घटनेने खळबळ ; आरोपीला पोलिसांनी केली अटक
कणकवली (प्रतिनिधी) : लहान भावाला घरात मान देतात, या किरकोळ कारणावरून भांडण होऊन सख्खा मोठा भाऊ आयसीन आंतोन फर्नांडिस याने आपला लहान भाऊ टोनी याच्या पोटात सुरा खुपसून त्याचा खून केला. कणकवली तालुक्यातील कुंभवडे गावातील या घटनेने खळबळ उडाली असून आरोपी आयसीन याला पोलीस निरीक्षक अनिल जाधव यांनी अटक केली आहे. याबाबत मयत टोनी याची आई मार्टिना फर्नांडिस हिने कणकवली पोलीस ठाण्यात फिर्याद दिली असून आरोपी आयसीन विरोधात आयपीसी 302 सह अन्य कलमानुसार गुन्हा दाखल करण्यात आला आहे. फिर्यादी मार्टिन यांनी दिलेल्या फिर्यादीनुसार मोठा मुलगा आयसीन याने घरातील किचन रूममध्ये सख्खा भाऊ टोनी याच्या पोटात सुरा खुपसला. ही घटना 22 मार्च रोजी रात्री 10 वाजून 45 मिनिटांनी घडली. या हल्ल्यात गंभीर जखमी टोनीला ऍम्ब्युलन्स मधून डॉक्टरकडे नेण्यात आले. परंतु अतिरक्तस्रावाने त्याचा मृत्यू झाला.
